【長者防跌攻略】每3個老人家就有1個跌過！居家安全由細節做起

常見跌倒原因你要知

好多人都以為老人家跌倒係因為年紀大、筋骨弱，但其實環境因素佔咗好大比重。地面濕滑、光線唔夠、雜物絆腳、拖鞋太滑、浴室無扶手——呢啲睇落細眉細眼既問題，正正就係意外既根源。另外，長者食緊既藥物都有影響，例如血壓藥、安眠藥或者某啲心臟藥都可能引起頭暈，令郁動個時容易失去平衡。慢性病如關節炎、白內障、糖尿病神經病變等都會削弱長者既活動能力同反應速度。

家居安全檢查清單

想預防跌倒，第一步就係執靚屋企環境。浴室係最危險既地方——建議安裝扶手、防滑墊，唔好留水跡喺地下。廳房既走廊要保持通爽，電線、地毯邊緣要收拾好或者用雙面膠紙固定。照明方面，老人家對光線既敏感度下降，床邊、走廊、廁所最好裝長明燈，開關要擺喺就手既位置。拖鞋方面，建議揀有防滑底、包裹性強既款式，唔好著住滑浸浸既膠拖鞋就出廳行。

生活小習慣 大大減風險

除咗環境改善，日常生活習慣都好重要。鼓勵長者每天做適量既簡單運動，例如喺安全情況下原地踏步、拉筋、打太極，既可以強化肌肉又可以改善平衡力。起身個時唔好心急，特別係起床或者坐耐咗郁之前，先坐穩再慢慢站起來。著鞋既時候要坐喺穩固既椅子上面唔好踎低，避免血壓波動引起頭暈。如果長者有視力問題，定期驗眼、配戴合適既眼鏡都係必要措施。

照顧者角色：陪伴同觀察

作為照顧者，你要做嘅係陪伴同留意，而唔係過度保護。有時長者因為怕麻煩人，或者驚被限制自由，會拒絕承認自己行唔穩。照顧者要細心觀察，留意長者行路時係咪有拖腳、踉蹌、扶住牆行走呢啲迹象，早啲發現就可以早啲處理。唔好先入為主覺得老人家就係咁，每個異常都可能係健康警號，及時帶佢哋睇醫生、做評估，先至係負責任既做法。

聯絡心橋

📞 電話：6919 8643

📧 電郵：admin@psybridgemedical.com.hk

🌐 網站：https://www.psybridgemedical.com.hk